ნათია ფანჯიკიძე სოციალურ ქსელში აქვეყნებს რაჭული ნაძვის ხეების ფოტოებს და გამოდის ინიციატივით, რომ რომელიმე ცენტრალურ მოედაზე ამ ხის დარგვით საახალწლო ნაძვის ხის პრობლემა მარტივად მოგვარდება.

გთავაზობთ სტატუსს:

„რაჭული ვერცხლისფერი ნაძვი, რომელსაც აქვს სათამაშოების დასაკიდებლად იდეალურად განლაგებული, უფუმფულესი ტოტები და ზღაპრული შეფერილობის უხშირესი წიწვები, რომლის თესლი ტონობით გააქვთ ევროპელებს საშობაო ნაძვების გასაზრდელად, მართალია, ნელა მზარდი ხეა, მაგრამ საბოლოოდ უზარმაზარი იზრდება და ფაქტობრივად, უკვდავი ხეა. რომ დავრგოთ რომელიმე ცენტრალურ მოედანზე და ყოველ მომდევნო შობას მივართვათ ახალი საჩუქრები ახლადგაზრდილი ტოტებისთვის და ჩვენც მასთან ერთად გავიზარდოთ? თანაც რაჭულს, ყველაფერს სიმშვიდე მოაქვს. კიდევ თანაც, ყველა ქვეყანას და ქალაქს აქვს თავისი სიმბოლოები, ტოტემის გადმონაშთივით, – ბერლინს დათვი, დუბაის აქლემი, ნიუ იორკს ხარი… ეს ხე უკვე ჩვენი ქვეყნის ერთერთი სიმბოლოა, რადგან ქრისტიანული სამყაროს ამხელა ყურადღება მიიქცია თავისი უნიკალური ფორმის გამო. ხოდა ჩავასკუპოთ პატივით და დიდებით, რა მოხდება. არავისი ნაძვის მათხუვრები ჩვენ არ ვართ, აქეთ გვეხვეწებიან თესლს. თან “ივენთი”უნდა შექმნა ამისგან – “წელს ჩვენი ნაძვი მეტრნახევრით გაიზარდა, ვიღებთ საჩუქრებს!”. ჩაერთოს მორთვაში ყველა ქვეყნის ქრისტიანი. როგორც ვაშინგტონში საკურას ყვავილობაზე დასასწრებად ჩადის აპრილში მილიონობით ტურისტი. ჰოდა, როცა ჩვენი ნაძვი ზრდას დაასრულებს და ცას მისწვდება, ჩვენც გავბრწყინდებით. და მერე გაბრწყინება ვიზეიმოთ“.

474 ნახვა

დაწერეთ თქვენი მოსაზრება

კომენტარი